نشرت دينا المختار، أرملة المنتج الفني الراحل تامر فتحي، منشور عبر حسابها الرسمي، كتبت فيه رسالة مؤثرة له حزنا على فراقه بعد رحيله منذ 5 شهور.
وكتبت دينا في منشورها: “مع نهاية هذا العام أقدر أقول كل مخاوفي اللي كنت بخاف منها تحققت ومبقاش عندي حاجه تانية أخسرها لأني خسرت أكبر وأعز وأغلى حد في حياتي. حقيقي مش قادرة أستوعب لحد دلوقتي عدم وجودك وسطنا. خمس شهور عدوا من غيرك كأنهم خمسين سنة، مازال عندي نفس الوجع والألم مش بيخف. ساعات ربنا بيهديني لحظات إنك مسافر أو في الشغل وراجع وآخر اليوم بكتشف انك مش راجع. مش بتيجي مش عارفة هتخطى ده امتى وازاي إلا برحمة ولطف ربنا بي”.
وأضافت دينا: “عزايا الوحيد انك بجد معايا ف كل حاجة بشوفك ف أحلامي بتيجي تطمني عليك وتضحكلي زي ما كنت بتضحكلي ع طول. مش قادرة أنسى آخر يوم بينا وانت هادي وبتضحك ونظراتك لي مش قادرة اتخطاها، وده كان اخر يوم لي حلو ف الدنيا دي. كل حاجة اتغيرت بعدك بس بحاول أبقى كويسة عشان انت تبقى متطمن ومرتاح عشان دايما كنت تقولي انت طول مانت كويسة كل حاجة بتبقى كويسة”.
وتابعت: “وحشتني أوي أوي وكل منايا وطلبي من ربنا انه يجمعني بيك ف جنات النعيم يا أغلى حاجة حصلت ف حياتي كلها. رحمة الله عليك يا حبيبي يا ونسي ف الدنيا اللي انتهى. غفر الله لك وجعل قبرك روضة من رياض الجنة يا رب”.
