استذكرت، ماس ابنة الملحن المصري الراحل محمد رحيم، في ذكرى رحيله اليوم، حيث كتبت على صفحتها على أحد مواقع التواصل الإجتماعي: “فكرت كتير في الكلام اللي نفسي أقوله النهارده، واللي عارفاه كويس أوي إنه هيوصلك وهتحس بيا عشان اللي بيني وبينك مكانش وعمره ما هيكون في الأرض وانتهى عليها وبس، يمكن بقالي 3 شهور بحاول أجمع كلامي وبقالي سنة بحاول أصدق، أنا بقيت أدور عليك في تفاصيل عمري”.
وتابعت: “بدور على صوتك في كلامي وملامحك في مرايتي وفي وشوش إخواتي وأهلنا، كل ما بتوحشني يا بابا بتفرج عليهم وبشوفك فيهم كل كلامك يهمني، وأي حاجة كانت بتيجي في بالك ولو ثانية كانت بتشغل تفكيري ويمكن عشان كدا أنا مش بنسى، أنا كنت بشوف حركاتك وتعبيراتك ومش بعيوني وخلاص أنت ليك مكان خاص جوه قلبي، وكل ما أفتكر ذكرياتنا وأرجع للماضي، من كتر إحساسي بيك، بحس إن اللحظة لسة عايشة ولسة بنتمشى في الشارع وأنا بغني بصوت عالي، عشان أنا وهارتي نضحك ونتكسف وأنت تضحك على رد فعلنا، أنا فقدت روحي ونفسي وإحساسي وإدراكي وشغفي، لما أنت مشيت، ولكن كل مرة بفتكرك فيها واللهِ واللهِ بيرجعولي تاني، ولو حد عايزني في حاجة بجد يحلفني بعيونك”.
وختمت:”ذكرى أليمة وبتوجعني وبتحطمني ولكن كفاية عندي إني بفتكرك أنت، ورب العالمين رزقني بيك وخلاني بنتك وخلى حبك في قلبي كبير كدا، عشان توحشني أوي، ادعو لقلبي بالرحمة والمغفرة.”